آسيا شامپيونلار ليگينين A قوروپوندا اؤتن هفته تبريزين سهند استاديوموندا تيراختور- الشباب اويونو گئرچكلَشدي.
گئديشباش اويونونو 0-1 حئسابي ايله رياضين ملك فهد استاديوموندا تيراختورو ائنن الشباب تيمي آخشام كي اويوندا عيني نتيجه ايله بيتيرميش اولدو. "قيزيل قوردلاري" بو تور كنترولو آلتينا آلان الشباب تيمي ده عرب خالقيندان "آغ آسلانلار" آديني يئرسيزجه آلماديغيني اثباتلادي. " قيزيل قوردلار" ايسه تكجه اؤز گوجسوزلويونو دئييل، باشقا يوزلرجه قانجيق پوسولارين بليرلي داربهلرينه مغلوب اولدو. تيراختور تيمي ائوصاحيبلييي ائتديي بير پوزوسيونو آلتميش مين طرفدارلارينين پئسيكولوژيك و هر تورلو دستهيينه رغمن ياخشي ديرلنديره بيلمهيهرهك موطلق بير فورصتي قاچيرميش اولدو. آسيا شامپيونلار ليگينده بير اولقو(پديده) كيمي آسياني سيلكلهين تيراختورون بو و باشقا بير چوخ ايران ليگيندهكي يئنيلگيلرينين بللي بير سيخينتيلار اوجوندان مئيدانا گلمهسي آرتيق هر كسجه آيديندير. بيرچوخ فيريلداق و آلچاقسي چابالار و فيريلداقلارلا تيراختورو سكتهيه اوغراتماق ايستهين ايران ليگ قورومو(سازمان ليگ) و فوتبول فدراسيونو آرتيق تيراختور تيمينين يؤنهتيجيلريني و تئكنيك ديرئكتورلاريني و طرفدارلارينيدا يؤنتمهيي باجارميشدير. اويون اوزهرينه توپو مئيداندا ياخشي فيرلادان تيراختور تيمينه باخسانيز، كؤشه ووروشلارينا(كرنر) سربست ووروشلارا(ضربه آزاد) جيناق سانترلارينا هئچ بير پلان و بليرگين استراتئژيسي يوخدور. رقيبين ساوونما دوواريني كئچه بيلمهدييي تقديرده تاكتيك دَييشيمي ياپا بيلمهيهرك عاجيز بير گؤرونتو سرگيلهيير گؤزلر اؤنونده. جيناقلاردان كئچهرهك قالا اوزهرينه آماجسيز توپلار آتماق يارارسيز اولدوقدا؛ دوز اويونا اوز گتيرمك، اوزاق شوت، ساوونمانين قلبيني هدفه آلماق، اويونو كنترولا آلماق،تجروبهلي و پروفئسيونال بير تيمين اوغورونو ساغلايا بيلر و سورونونو چؤزه بيلردي آرتيق، بيز بونلارين هئچ بيريسيني بو ايكي اويوندا گؤرمهديك تيراختوردان. بئله حاللاردا فردي يئتهنكلي فوتبولچولاردا تيمين دادينا چاتا بيلر آرتيق. نسه، اويونچو آزليغي، مكممل تاماملاييجي و قالاچي يوخلوغو و ... ايلك باخيشدا گؤزه گلمهسهده گئتديكجه اؤزونو آچيق آيدين گؤسترميش اولور. تيراختورون بوتون باشاري پوتانسيئليني وضعيني ياخشي آناليز ائدن الشباب تيمي اويونو چوخ تمكينلي بير بيچيمده كنترولونا آليب و اويونو باشاري ايله يؤنتمهيي باجاراراق آلتميش مين طرفدار اؤنونده تيراختوردان اوچ پوآن آلماغي باجاردي. اويونون حاشيهلريندن بير اردبيل دن گلن اوتوبوسو و مشكين دن گلن مينيبوسو قايتاريبلار. اهرين يول پوليس ادارهسي قالاباليقدير. بير عسگر باشيني بيزيم قورازا پئيكانا اوزادير: « پرچملري گيزلهدين. دئيين تئهرانا گئديريك» بايراقلاري صندللرين آلتينا سوخور ويالان دانيشير و قيل كؤرپودن كئچيريك. استاديومون قاباغي قالاباليقدير قيرميزي بايراقلاري يازيلي پارچالاري و... سئوگيسيني و دستهييني تيراختور تيمينه آشيلايان يازيلي پارچالارين هاميسيني ظبط ائديرلر. بليط ساعات 1-دن ساتيلماغا باشلايير. تئهرانين عكسينه اولاراق تبريز راديو تئلئويزياسي هئچ بير استاديوما دعوت وئرليشي آپارمير. عكسينه استاديوم دولوب دئيه طرفداري ائوده قالماغا مجبور ائديرلر. پرچملري اللريندن آليب استاديوما بوراخيلميش سينيرلي (عصباني) طرفدارلار استاديومدا قالديريلميش يالقيز بير ايران پرچمينه يوروش ائدير. اونو آليب جيريب آياقلاري آلتينا ساليرلار. اورادا بير ووروشمادا باش وئرير. اؤزهل مامورلار آراچيليغييلا ايش تاماملانير. آزربايجانا عاييد شعارلار وئريلنده استاديوم بلند گولارينين بير پارازيت رولوندا قوللانيلماسيدا گولمهلي ايدي. بوفه صفلرينين اوجو بوجاغي گؤرسنمير. سلوقانلار(شعارلار) هميشهكي كيمي جوشغولو و شعورلودور. استقلال- تيراختور اويونوندا، استقلال طرفدارلاري ايشغالچي ائرمنيستانين پرچميني قالديرماغي دا اونوتماميشدي تيرراختورچولار و بو چيركين حركته جاواب اولاراق موسلمان قارداشلاري آزربايجان پرچميي ده تيراختور طرفدارلاري وريندن قالديريلدي. باشقا اويونلاردان فرقلي اولاراق بير شعار دا سسلهنير:« جعفري عار ائله- تيراختورو تَرك ائله»
آجي گئرچكلر تيمده آز چوخ اؤزونو گؤسترن دئدي-قودولار (حاشيهلر) مالي اوچوروم، يؤنتيم ضعيفلييي،اولومسوز تبليغات، اويونچو آزليغي طرفدارلار اوزهرينه حاكيم اولان آغير و اوتانج باسقي، شانتاژ، توتقو و ... (پرچم و يئمك وسايطي و يازيلي پارچالاري ايچهري بوراخماماق، پاركينگ وئرمهمك شهردن اوتوبوس مينيبوس خطي استاديوما قويماماق، اويونلارين ساعات و گونونو ان پيس بير مؤوقعه سالماق، بليط اوزهرينده فيريلداقلار، اويون اؤنجهسي قفهلره، كافي شاپلارا حمله ائديب تيراختورچولاري بازداشت ائتمك طرفدارلاري حيمايت ائتمك يئرينه مين جورلر اينجيتمك و... بو سايديقلاريميز سورونلار آرادان قالديريليب آغيللي بير سياست قوللانيلمازسا، بو پيس بير دوروما گتيريب چيخارا بيلر هر شئيي. تيراختور طرافدارلاريني اوندان آرالاياراق اونو يالنيز و سئوگيلي اولمايان بير تيم كيمي مئيدانلارا بوراخماق هئچ كيمسهنين خئيرينه اولماياراق بو اود اؤنجه ياخانلاري يانديراجاقدير. بو چيركين و كيرلي فضا و آلچاق سئناريولار تكجه تيراختور و آزرابيجان تيملري اوزهرينه قورولموش و دولاييسي يوللارلا حياتا كئچيريلهرهك بو تيمين ايستكليليييني (محبوبيت) آزالتماق، طرافدارلارين غرورونو تاپداماق، و تيمدن آييرماق، تيمي يالقيز قويماق و سونوندا چؤكدورمك نيتينده باشلاديلميشدير. مينلرجه بو كيرلي و آلچاق سياستلري، كمالوند و شفق جنابلارينين تيمدن اوزاقلاشديريلماسي و جعفري كيمي بير سپاه مأذونونون تيمه تحميل اولونماسي ايله باشلاتميشلار. نه ياخشي كي بو آلچاقسي تاوير و اَسگيك چابالارين و فيريلداقلارين هاميسيني آزربايجان اينساني و تيراختورون شعورلو و بيلينجلي طرفدارلاري ياخشيجا باشا دوشور و بيليرلر.¬¬¬ دئمهلي"قوردلار درهسي" آدلانان سهند استاديومو و "قيزيل قوردلار" آدلانان تيراختور فوتبولچولاري و بو اولقونون اصيل يئيهلري شعورلو طرفدارلارين يولوندا، آلچاق سئناريستلر طرفيندن بير قانجيق پوسولار باش توتورسا دا، باشا يئتمهيهجكدير.
www.ANLAM.biz